“Azərbaycanda Korporativ İstiqraz Bazarının İnkişafı” mövzusunda beynəlxalq konfrans keçirilmişdir
03 iyul 2009-cu il tarixində Azərbaycan Respublikasının Qiymətli Kağızlar üzrə Dövlət Komitəsinin (QKDK) dəstəyi və Yapi ve Kredi Bankası A.Ş-nin təşkilatçılığı ilə “Azərbaycanda Korporativ İstiqraz Bazarının İnkişafı” mövzusunda beynəlxalq konfrans təşkil olunmuşdur. Tədbirdə QKDK ilə yanaşı Milli Məclisin İqtisadi Siyasət Komitəsi, beynəlxalq investorlar, səhmdar cəmiyyətləri, maliyyə-bank təsisatları, eləcə də, Milli Depozit Mərkəzi, Bakı Fond Birjası və Azərbaycanda fəaliyyət göstərən digər qiymətli kağızlar bazarının peşəkar iştirakçıları və həmçinin maliyyə-iqtisadi sahədə fəaliyyət göstərən beynəlxalq təşkilatlar iştirak edirdilər.
Konfransın əsas məqsədi Azərbaycanda fəaliyyət göstərən təşkilatların maliyyə ehtiyaclarının təmin edilməsi üçün qiymətli kağızların beynəlxalq təcrübədə geniş yayılmış alətlərindən olan korporativ istiqrazların tədbiqi mexanizmlərini, eləcə də, onun Azərbaycanda inkişaf perspektivlərini ətraflı müzakirə etməkdən və emitentlərə investorlar arasında bu sahədə birbaşa səmərəli dialoqun təşkil edilməsindən ibarət idi.
