Maddə 1

Ümumi müddəalar

1.1. Milli Depozit Mərkəzi (bundan sonra - MDM) - qapalı tipli səhmdar cəmiyyətidir. MDM 02.10.97-ci il tarixində D-20 No-li Şəhadətnamə ilə Azərbaycan Respublikası Ədliyyə Nazirliyi tərəfindən dövlət qeydiyyatına alınmış "MÜLK" Milli Depozit Mərkəzi Qapalı Tipli Səhmdar Cəmiyyətinin bazasında yenidən yaradılır və onun hüquqi varisidir.

1.2. MDM Azərbaycan Respublikasının "Səhmdar cəmiyyəti haqqında", "Qiymətli kağızlar haqqında" Qanunlarına, Azərbaycan Respublikasının 29 sentyabr 1995-ci il tarixli Qanunu ilə təsdiq edilmiş "Azərbaycan Respublikasında 1995 - 1998-ci illərdə dövlət mülkiyyətinin özəlləşdirilməsinin Dövlət Proqramı"na, Azərbaycan Respublikası Prezidentinin 14 may 1997-ci il tarixli 580 nömrəli Fərmanı ilə təsdiq edilmiş "Milli Depozit Sistemi haqqında" və 14 may 1997-ci il tarixli 581 nömrəli Fərmanı ilə təsdiq edilmiş "Dövlət müəssisələrinin özəlləşdirilməsi zamanı yaradılmış səhmdar cəmiyyətlərinin və ixtisaslaşdırılmış çek investisiya fondlarının səhmdarlarının reyestrinin aparılması qaydaları haqqında" Əsasnamələrə, Azərbaycan Respublikası Prezidentinin 26 iyul 1999-cu il tarixli "Azərbaycan Respublikasının Prezidenti yanında Qiymətli Kağızlar üzrə Dövlət Komitəsinin fəaliyyətinin təmin edilməsi haqqında" Fərmanına və həmin fərmanla təsdiq edilmiş "Azərbaycan Respublikasının Prezidenti yanında Qiymətli Kağızlar üzrə Dövlət Komitəsi haqqında" Əsasnaməyə və bu Nizamnaməyə müvafiq olaraq fəaliyyət göstərir.

1.3. MDM - Milli Depozit Sisteminin tərkib hissəsi olaraq bilavasitə depozitar fəaliyyəti ilə məşğul olan və depozit sisteminə daxil olan depozitarların uçotunu aparan, onların fəaliyyətinə nəzarəti həyata keçirən dövlət təşkilatıdır.

1.4. Qapalı tipli səhmdar cəmiyyəti formasında olan MDM-nin təsisçisi Azərbaycan Respublikasının Prezidenti yanında Qiymətli Kağızlar üzrə Dövlət Komitəsidir (bundan sonra - QKDK). MDM-nin səhmləri özgəninkiləşdirildiyi zaman QKDK səhmlərin nəzarət paketini özündə saxlayır.

1.5. MDM-nin fəaliyyət müddəti məhdudlaşdırılmır.

Maddə 2

MDM-nin adı və yerləşdiyi ünvan

2.1. MDM-nin azərbaycan dilində tam adı - Milli Depozit Mərkəzi Qapalı Tipli Səhmdar Cəmiyyəti.

MDM-nin azərbaycan dilində qısaldılmış adı - Milli Depozit Mərkəzi QTSC.

MDM-nin ingilis dilində tam adı - Closed Joint Stock Company National Depository Center.

MDM-nin ingilis dilində qısaldılmış adı - CJSC National Depository Center.

2.2. MDM-nin hüquqi ünvanı: Azərbaycan Respublikası, Bakı ş., Bül-bül pr., 19

Maddə 3

MDM-nin hüquqi statusu

3.1. MDM dövlət qeydiyyatına alındığı andan Azərbaycan Respublikasının qanunvericiliyinə əsasən hüquqi şəxs hesab olunur.

3.2. MDM balansında göstərilən ayrıca əmlakın mülkiyyətçisidir.

3.3. MDM öz adından Azərbaycan Respublikasının qanunvericiliyinə zidd olmayan müqavilələr bağlayır, əmlak, şəxsi qeyri-əmlak hüquqlarını əldə edir və həyata keçirir, məhkəmədə, arbitraj (iqtisad) və münsiflər məhkəməsində iddiaçı və cavabdeh kimi çıxış edir.

3.4. MDM müəyyən edilmiş qaydada Azərbaycan Respublikasının ərazisində və onun hüdudlarından kənarda bank hesabları aça bilər.

3.5. MDM qeydiyyata alınan əmtƏ nişanına, üzərində onun tam adı və yerləşdiyi yer Azərbaycan və ingilis dilində həkk olunmuş dairəvi möhürə, ştamp və blanklara, şəxsi emblemaya malikdir.

3.6. MDM, onun səhmlərinin ödənilməsi üçün səhmdarlar tərəfindən verilən, öz fəaliyyəti nəticəsində əldə edilən, həmçinin digər mənbələrdən daxil olan vəsaitin mülkiyyətçisidir.

3.7. MDM öz öhdəlikləri üçün bütün əmlakı ilə məsuliyyət daşıyır. Dövlət MDM-nin öhdəlikləri üçün onun nizamnamə kapitalındakı payı həcmində məsuliyyət daşıyır. MDM dövlətin və öz müştərilərinin öhdəlikləri üçün məsuliyyət daşımır.

MDM-nin öhdəliklərinin yerinə yetirilməsinə və borclarına görə səhmdarlar yalnız öz səhmləri həcmində məsuliyyət daşıyırlar. Səhmdar səhmin dəyərini tam ödəmədiyi halda ödənilməmiş hissəyə görə öz əmlakı ilə məsuliyyət daşıyır.

3.8. MDM Azərbaycan Respublikasının ərazisində və onun hüdudlarından kənarda öz filiallarını və nümayəndəliklərini yarada bilər.

3.9. Filiallar və nümayəndəliklər hüquqi şəxs olmayıb, öz fəaliyyətlərini MDM tərəfindən təsdiq olunmuş Əsasnamələr əsasında qururlar.

MDM öz tərəfindən yaratdığı filial və nümayəndəliklərin funksiyalarını həyata keçirmək məqsədilə onları lazımi əmlakla təmin edir.

Filial və nümayəndəliklərin rəhbərləri MDM tərəfindən təyin olunur və MDM tərəfindən verilən etibarnaməyə əsasən fəaliyyət göstərirlər.

Maddə 4

MDM-nin əsas vəzifələri və hüquqları

4.1. MDM-nin əsas vəzifə və hüquqları aşağıdakılardan ibarətdir:

a) sənədli qiymətli kağızların sertifikatlarının, sənədsiz qiymətli kağızlar üzrə hüquqların və qiymətli əşyaların saxlanması sahəsində onların sahiblərinə və onların qanuni nümayəndələrinə xidmət göstərmək;

b) hər cür qiymətli kağızların və onlara dair açılmış depo hesablarında deponentlərin ayrıca uçotunu aparmaq;

v) qiymətli kağızları depo hesablarında saxlanılmağa vermiş hüquqi şəxslərin, saxlanılmağa qəbul edilmiş qiymətli kağızların, onların növlərinin, kateqoriyalarının, formalarının və miqdarının, həmin qiymətli kağızlarla əməliyyatlar aparılan zaman hüquqların başqasına keçməsinin təsdiq olunmasının, bu hüquqların verilməsinin məhdudlaşdırılmasının, habelə qiymətli kağızların xırdalanması, birləşdirilməsi, konvertasiyası, ləğvi və ödənilməsi əməliyyatlarının uçotunu aparmaq;

q) saxlanmada olan və ödəmək üçün təqdim edilmiş, yaxud digər şəkildə dövriyyə müddəti bitmiş olan bütün qiymətli kağızları, habelə təqdim edildikdə ödəniş nəzərdə tutan digər gəlir sənədlərini emitentə vermək;

d) hüquq sahibindən və ya onun səlahiyyətli nümayəndələrindən təlimatlar alaraq onları emitentə vermək, habelə hüquq sahibinin mənafeyi naminə müəyyən edilmiş qaydada digər hərəkətləri yerinə yetirmək;

e) hüquq sahiblərinin hər birinə məxsus qiymətli kağızların növlərinin, kateqoriyalarının, formalarının, miqdarının və həmin qiymətli kağızların saxlanma yerlərinin uçotunu aparmaq;

ə) hüquq sahiblərinin qiymətli kağızlarının alınması, qiymətli kağızların özgəninkiləşdirilməsi, qiymətli kağızların (girov da daxil olmaqla) öhdəliklərlə yüklənməsi faktlarının qeydiyyatı ilə bağlı tapşırıqları əsasında müştəri hesablarında müvafiq qeydlərin edilməsi yolu ilə, hüquq sahibinə məxsus qiymətli kağızlarda təsbit olunmuş hüquqların uçotunu aparmaq və onların başqasına keçməsini, verilməsini və məhdudlaşdırılmasını təsdiq etmək;

c) hüquq sahibinin korporativ hərəkətlərə aid tapşırıqlarını emitentə çatdırmaq;

z) hüquq sahiblərinin hər birinə məxsus qiymətli kağızlar haqqında məlumatları və həmin hüquq sahiblərinin siyahılarını emitentə vermək;

i) qiymətli kağızların nominal saxlayıcının idarəetməsindən çıxarıldığı halda hüquq sahibinin adının qiymətli kağız sahiblərinin reyestrində nominal saxlayıcının adının yerinə yazılması barədə həmin hüquq sahibinin tələbini emitentə çatdırmaq;

y) bütün hərəkətlərin yalnız hüquq sahiblərinin və ya onların səlahiyyətli nümayəndələrinin yazılı göstərişləri əsasında həyata keçirmək və müştəri hesablarının vəziyyətində dəyişikliklər edilməsi üçün əsas olan bütün ilkin sənədləri saxlamaq;

k) müştəri hesabından hüquq sahibinə çıxarışlar və aparılmış hər bir əməliyyat haqqında çıxarışlar verməklə həmin müştəri hesabını təsdiq etmək;

l) öz uçot qeydlərinin və elektron-rəqəmli imza ilə təsdiq olunmuş tapşırıqların (uçot elektron daşıyıcıları vasitəsi ilə aparıldıqda) təkrarlanmış halda saxlanılmasını təşkil etmək;

m) emitentlə müqavilə əsasında qiymətli kağız sahiblərinin reyestrini aparmaq;

n) özəlləşdirilən kiçik müəssisələrin nizamnamə kapitalının qanunvericiliklə müəyyən edilmiş hissəsinin nominal üzrə özəlləşdirmə çekləri ilə ödənilməsini təmin etmək məqsədilə xüsusi depo hesabı açmaq;

o) orta və iri müəssisələrin səhmlərinə güzəşt hüququ ilə qapalı abunə yazılışında iştirak etmək hüququ olan şəxslər üçün MDM-də xüsusi depo hesabları açmaq;

p) qapalı abunə yazılışının yekunlarına əsasən bölüşdürülmüş səhmlərin deponentləşdiyi hesabda səhmdarların payını müəyyən etmək və səhmdarlara müvafiq sayda səhmlərə sahiblik hüququnu təsdiq edən səhmdar cəmiyyətin reyestrindən çıxarışlar təqdim etmək;

r) depozitar xidmətləri göstərmək üçün ixtisaslaşdırılmış çek investisiya fondları ilə depozitar müqaviləsi bağlamaq, onların aktivlərinin qiymətləndirilməsini təmin etmək və qiymətli kağızları ilə əməliyyatlar aparmaq;

s) qiymətli kağızlar bazarında peşəkar fəaliyyət növləri ilə məşğul olmaq.

4.2. Yuxarıda göstərilən vəzifələri həyata keçirmək üçün MDM:

a) qiymətli kağızların saxlanması və uçotunun aparılmasını

b) qiymətli kağız sahiblərinin və onların qiymətli kağızlarının miqdarının uçotunun aparılmasını

v) qiymətli kağızlar üzrə əqdlərin qeydiyyatının aparılmasını

q) qiymətli kağız sahiblərinin reyestrinin aparılmasını

d) qiymətli kağızlarda təsbit olunmuş hüquqların təmin edilməsini və onların uçotunun aparılmasını

e) qiymətli kağızlar üzrə klirinq əməliyyatlarının yerinə yetirilməsini;

ə) bütün növ qiymətli kağızlarla girovun, qiymətli kağızlarla rəsmiləşdirilmiş borc öhdəliklərinin qeydiyyatının aparılmasını

c) qiymətli kağızara sahibliklə əlaqədar informasiyanın emitentdən (reyestr saxlayandan) deponentlərə (müştərilərə) və deponentlərdən (müştərilərdən) qiymətli kağızların emitentinə (reyestr saxlayana) verilməsini;

z) deponentlərin qiymətli kağızlarının öhdəliklərlə yüklənməsinin, habelə onların ləğvinin uçotunu;

i) səhmdarların yığıncaqları, dividendlərin verilməsi və emitentin digər korporativ hərəkətləri barədə qiymətli kağız sahiblərinə və ya onların səlahiyyətli nümayəndələrinə məlumat verilməsini;

y) emitendən alınmış dividendləri, qiymətli kağızlar üzrə digər gəlirləri və ödənişləri depozitar müqaviləsində nəzərdə tutulmuş formalarda və qaydada, vaxtında və tam həcmdə qiymətli kağız sahiblərinə ötürülməsini;

k) depozitarın nominal saxlayıcı kimi çıxış etdiyi qiymətli kağızlar istisna olmaqla, emitentlə müqavilə əsasında qiymətli kağız mülkiyyətçilərinin reyestrinin aparılmasını

l) deponentlərin tapşırığına əsasən qiymətli kağız sertifikatlarının üçüncü şəxslərə verilməsini;

m) qiymətli kağız sertifikatlarının həqiqiliyinin yoxlanılmasını

n) qiymətli kağızların inkassasiyasını və daşınmasını

o) qiymətli kağız sertifikatlarının dövriyyə şərtlərinə uyğun olaraq, dövriyyədən çıxarılmasını təmin edir.

4.3. MDM-nin aşağıdakıları həyata keçirmək hüququ yoxdur:

a) hüquq sahibi ilə depozitar arasındakı müqavilədə nəzərdə tutulmuş hallarda hüquq sahibinin tapşırığı ilə həyata keçirilən hərəkətlərdən başqa hüquq sahibinin qiymətli kağızlarının üzərində sərəncam vermək, onları idarə etmək, yaxud hüquq sahibinin adından ona məxsus qiymətli kağızlarla istənilən hərəkətləri etmək;

b) deponentlə depozitar müqaviləsi bağlanarkən təsbit edilmiş hüquqların hər hansından deponentin imtina etməsi şərtini qoymaq;

v) hüquq sahibinin qiymətli kağızlarından öz öhdəliklərinin və üçüncü şəxslərin öhdəliklərinin icrasının təminatı kimi istifadə etmək. (Əməliyyat hesabında olan və hüquq sahiblərinin qiymətli kağızı kimi uçota alınan qiymətli kağızlar depozitarın üçüncü şəxslər qarşısında öhdəliklərinin təminat predmeti olan əmlakının tərkibinə daxil edilə bilməz);

q) hüquq sahibi ilə müqavilə bağlamadan onun vəkili kimi çıxış etmək;

d) qanunvericiliklə nəzərdə tutulmuş hallardan başqa hüquq sahibinin hesab sirrini açmaq;

e) deponentlərin qiymətli kağızları ilə alqı-satqı, komisyon, tapşırıq, bağışlama, dəyişmə və icarə əqdləri bağlamaq, habelə deponentlərlə birgə fəaliyyət göstərmək.

Maddə 5

MDM-nin məqsəd və səlahiyyətləri

5.1. MDM-nin əsas məqsədi Azərbaycan Respublikasında qiymətli kağızların, o cümlədən dövlət özəlləşdirmə paylarının (çeklərinin) və opsionlarının müəyyən olunmuş qaydada saxlanılmasını, nağd və nağdsız dövriyyəsini təmin etmək, səhmdarların reyestrini aparmaq, qiymətli kağız mülkiyyətçilərinin və alqı-satqı müqavilələrinin qeydiyyatını, eləcə də digər depozitar xidmətlərini həyata keçirmək, habelə depozit sisteminə daxil olan depozitarların uçotunu aparmaq, onların fəaliyyətinə nəzarəti həyata keçirməkdir.

5.2. MDM Milli Depozit Sistemində qiymətli kağızların tədavülünə dair uçotun sənədləşməsini tərtib edir və bu vahid sənədləşmə Azərbaycan Respublikasında depozitar fəaliyyəti göstərən müstəqil depozitarlar üçün məcburidir.

MDM müstəqil depozitarlarla öz fəaliyyətini vahid Milli Depozit Sistemi çərçivəsində həyata keçirir.

5.3. MDM QKDK tərəfindən müəyyən edilmiş qiymətli kağızlar bazarında hamı üçün açıq olan informasiya sisteminin yaradılması qaydalarına riayət etməklə qiymətli kağızlar bazarını xarakterizə edən qeydiyyat və yenidən qeydiyyat, mülkiyyət hüququnun saxlanması, məxfiliyi və digər funksional göstəricilərin uçotu üzrə vahid kompyuter texnologiyası bazasında inteqrallaşmış hesablama-telekommunikasiya sisteminin formalaşmasını təşkil edir.

5.4. MDM bu Nizamnamədə nəzərdə tutulan fəaliyyət növlərinin həyata keçirilməsi üçün məsuliyyət daşıyır.

5.5. MDM digər təşkilatları yarada, müəssisələrin, bank və digər kredit, sığorta, nəşriyyat işi ilə məşğul olan təşkilatlarının nizamnamə kapitalında iştirak edə və qanunvericiliklə nəzərdə tutulmuş qaydada kredit təşkilatının funksiyalarını həyata keçirə bilər.

5.6. MDM müəsssisələr, binalar, qurğular, avadanlıqlar, torpaq sahələrini, qiymətli kağızlar və həmçinin Azərbaycan Respublikasının qanunvericiliyinə uyğun olaraq mülkiyyət hüququnun obyekti olan digər əmlak əldə edə və ya özgəninkiləşdirə bilər.

5.7. MDM Azərbaycan Respublikasının qanunvericiliyi ilə nəzərdə tutulmuş qaydada qiymətli kağızlar buraxmaq hüququna malikdir.

5.8. MDM öz fəaliyyətini müstəqil olaraq planlaşdırır və həyata keçirir, işlərin və xidmətlərin qiymətlərini, həmçinin əqdlər üzrə aparılan hesablaşmaların formalarını və qaydalarını müəyyən edir.

5.9. MDM qeyri-kommersiya qurumu olaraq fəaliyyətini özxərciniödəmə və özünümaliyyələşdirmə prinsipləri əsasında həyata keçirir.

MDM müştərilərə göstərdiyi xidmətlər üçün müqavilə ilə müəyyən olunmuş məbləğdə haqq alır.

5.10. MDM aşağıdakı əməliyyatları həyata keçirir:

- qiymətli kağızlar bazarının iş və xidmətlərinin, konyukturasını öyrənmək məqsədilə tədqiqat işləri aparır;

- Azərbaycan Respublikasında və onun hüdudlarından kənarda dövlət orqanları, kommersiya və digər təşkilatlarla, təsisatlar, vətandaşlar və onların nümayəndələri ilə işgüzar əlaqələri yaradır;

- daşınan və daşınmaz əmlak icarəyə götürür;

- müxtəlif riskləri sığorta təşkilatlarında sığortalayır;

- milli və xarici bankların, digər kredit təşkilatlarının kreditlərindən istifadə edir;

- Azərbaycan Respublikasının qanunvericiliyinə uyğun olaraq xarici valyuta əldə edir;

- fəaliyyətinin bütün istiqamətləri üzrə kadrların hazırlanması və ixtisaslarının artırılmasını təşkil edir.

5.11. MDM öz işçiləri üçün əlavə məzuniyyət, qısaldılmış iş günü və digər sosial güzəştlər müəyyən edə bilər. MDM öz işçiləri arasında bölüşdürülməyə, həmçinin mükafatlandırmağa yönəldilən təmiz mənfƏtin hissəsini mövcud qanunvericiliyə uyğun şəkildə müəyyən edə bilər.

5.12. MDM dövlətin sosial, iqtisadi və vergi siyasətini həyata keçirmək məqsədi ilə:

- sənədlərin saxlanılmasına görə cavabdehlik daşıyır (idarəetmə, maliyyə, təsərüffat, şəxsi heyət üzrə və digər sənədləşmə);

- onun fəaliyyətinə aid olan sənədlərin müəyyən olunmuş qaydada saxlanmasını təmin edir.

5.13. MDM bu Nizamnamədə və Azərbaycan Respublikasının qanunvericiliyində nəzərdə tutulan fəaliyyət növlərinə uyğun olaraq xarici iqtisadi fəaliyyəti həyata keçirir.

Maddə 6

MDM-nin nizamnamə kapitalı

6.1. MDM-nin nizamnamə kapitalı QKDK tərəfindən formalaşdırılır və 7.000.000.000 (yeddi milyarl) manat təşkil edir.

6.2. MDM-nin nizamnamə kapitalı hər birinin nominal dəyəri 100.000 (yüz min) manat olan 70.000 (yetmiş min) adi adlı səhmlərə bölünmüşdür.

6.3. MDM-nin səhmlərinin özgəninkiləşdirilməsi QKDK-nin qərarı ilə qüvvədə olan qanunvericiliklə müəyyən edilmiş qaydada həyata keçirilir.

6.4. MDM zəruri hallarda aşağıdakıları edə bilər:

a) bu Nizamnamə ilə müəyyən edilən, elan olunmuş səhmlərin miqdarı çərçivəsində əlavə səhmlərin yerləşdirilməsi yolu ilə və ya bütün yerləşdirilmiş səhmlərin və yaxud müəyyən növ səhmlərin nominal dəyərinin artırılması yolu ilə Nizamnamə kapitalının artırılmasını

b) buraxılmış səhmlərin cəmlənməsi və ya onların az nominallı səhmlərə bölünməsini;

v) bütün yerləşdirilmiş səhmlərin və ya müəyyən növ səhmlərin nominal dəyərinin azaldılması və yaxud, "Səhmdar cəmiyyəti haqqında" Azərbaycan Respublikasının Qanununda nəzərdə tutulmuş hallarda, MDM tərəfindən səhmlərin bir hissəsinin əldə olunması daxil olmaqla, səhmlərin ümumi miqdarının azaldılması yolu ilə nizamnamə kapitalının azaldılmasını.

6.5. Elan olunmuş səhmlər çərçivəsində əlavə səhmlərin yerləşdirilməsi şərtləri və qaydaları haqqında qərar Müşahidə şurası tərəfindən qəbul olunur.

6.6. MDM-nin nizamnamə kapitalının artırılması və azaldılması səhmdarların Ümumi yığıncağının qərarı ilə həyata keçirilir.

6.7. MDM-nin buraxdığı qiymətli kağızlar pul vəsaitləri, qiymətli kağızlar, başqa növ əmlak və ya pul dəyəri olan əmlak hüquqları, yaxud digər hüquqlarla ödənilə bilər.

6.8. MDM-nin səhmlərinin ödənilməsi üçün verilən əmlakın pulla qiymətləndirilməsi Azərbaycan Respublikasının qanunvericiliyi ilə nəzərdə tutulmuş qaydada MDM-nin səhmdarlarının Ümumi yığıncağı tərəfindən aparılır.

6.9. Nizamnamə kapitalının 60%-i QKDK tərəfindən MDM-nin səhmləri dövlət qeydiyyatına alınan vaxtdan etibarən bir il müddətində tam ödənilməlidir.

MDM-nin əlavə səhmləri onların yerləşdirilməsi haqqında qərarda müəyyən olunmuş, lakin onların əldə olunduğu müddətdən bir ildən gec olmayaraq ödənilməlidir.

MDM yaradılarkən QKDK tərəfindən əldə edilən səhmlər istisna olmaqla, dəyəri tam ödənilməyən səhmlər səs hüququna malik deyil.

Maddə 7

MDM-nin səhmləri və digər qiymətli kağızları.

Səhmdarların hüquqları

7.1. MDM müəyyən olunmuş qaydada səhmlər buraxmaq hüququna malikdir. MDM-nin bütün səhmlərinin nominal dəyəri eynidir.

7.2. MDM-nin səhmlərinin emissiyası, onların buraxılış qeydiyyatı və yerləşdirilməsi bu Nizamnamə və Azərbaycan Respublikasının qanunvericiliyi ilə tənzimlənir.

7.3. MDM-nin səhmdarları Azərbaycan Respublikasının və xarici dövlətlərin hüquqi və fiziki şəxsləri ola bilər.

7.4. MDM-nin səhmdarı öz səhmini digər şəxslərə yalnız MDM-nin səhmdarlarının əksəriyyətinin razılığı ilə notariat qaydasında təsdiq etdirmək şərtilə özgəninkiləşdirə bilər. Səhmdar öz səhmini özgəninkiləşdirmək üçün razılıq almadığı halda, o, səhminin dəyərini MDM-dən geri almaq hüququna malikdir.

7.5. MDM-nin buraxdığı səhmlər bölünməzdir. MDM-nin buraxdığı səhm bir neçə şəxsə məxsus olduqda, bütün mülkiyyətçilər bir səhmdar kimi tanınır.

7.6. MDM-nin səhmdarları aşağıdakı hüquqlara malikdir:

a) MDM-nin səhmdarlarının Ümumi yığıncağında iştirak etmək;

b) MDM-nin xidmətlərindən güzəştli şərtlərlə istifadə etmək;

v) MDM ləğv olunduqda - Azərbaycan Respublikasının qanunvericiliyi və bu Nizamnamə ilə nəzərdə tutulan qaydada nizamnamə kapitalından onlara düşən hissələri almaq;

q) MDM-nin fəaliyyəti, o cümlədən səhmdarların Ümumi yığıncağının gündəliyinə salınan məsələlər haqqında informasiya almaq;

d) Azərbaycan Respublikası qanunvericiliyində nəzərdə tutulan qaydada öz hüquqlarını bilavasitə və ya öz nümayəndəsi vasitəsilə həyata keçirmək;

e) Azərbaycan Respublikasının qanunvericiliyində və bu Nizamnamədə nəzərdə tutulan digər hüquqları həyata keçirmək.

7.7. MDM-nin hər bir adi səhmi səhmdara eyni hüquq verir.

MDM-nin adi səhmlərinin sahibi səhmdarların Ümumi yığıncağında öz səlahiyyətlərinə aid məsələlər üzrə səs hüququ ilə iştirak edə bilər.

7.8. MDM-nin səhmdarları MDM-nin fəaliyyəti haqqında məxfi məlumatları gizli saxlamalıdırlar.

7.9. MDM-nin adi səhmə malik olan səhmdarı səhmlərin əldə edilməsi və ya səhmlərin dəyərinin ödənilməsi üzrə öhdəliklərini pozduğu halda, malik olduğu səhmlərin sayından asılı olmayaraq səsvermə hüququndan məhrum edilir.

7.10. MDM Azərbaycan Respublikasının qanunvericiliyinə əsasən digər qiymətli kağızlar buraxmaq və yerləşdirmək hüququna malikdir.

MDM tərəfindən qiymətli kağızlar buraxmaq haqqında qərarın qəbul edilməsi MDM-nin səhmdarlarının Ümumi yığıncağının səlahiyyətlərinə daxildir.

Buraxılan qiymətli kağızların yerləşdirilməsi MDM-nin Müşahidə şurasının qərarı ilə həyata keçirilir.

Maddə 8

MDM-nin səhmdarlarının reyestri

8.1. Səhmdarların reyestri bilavasitə MDM tərəfindən aparılır.

8.2. MDM-nin səhmdarlarının reyestri Azərbaycan Respublikası qanunvericiliyində nəzərdə tutulmuş qaydada aparılır və MDM yerləşən yerdə saxlanılır.

8.3. Hər bir səhmdar (nominal saxlayıcı) reyestrə daxil olunması haqqında məlumatı öyrənmək hüququna malikdir. MDM səhmdarların (nominal saxlayıcının) tələbi ilə səhmlərə hüquqlarını təsdiqləyən reyestrdən çıxarışları onlara təqdim etməlidir.

Maddə 9

İdarəetmə və nəzarət orqanları

9.1. MDM-nin fəaliyyətini tənzimləmək üçün aşağıdakı idarəetmə və nəzarət orqanları yaradılır.

9.1.1. İdarəetmə orqanları:

a) Səhmdarların Ümumi yığıncağı

b) Müşahidə şurası

v) İdarə heyəti.

9.1.2. Nəzarət orqanı:

a) Təftiş komissiyası.

Maddə 10

Səhmdarların Ümumi yığıncağı

10.1. MDM-nin ali idarəetmə orqanı MDM-nin səhmdarlarının Ümumi yığıncağıdır.

10.2. MDM-nin səhmdarlarının Ümumi yığıncağının səlahiyyətlərinə aşağıdakı məsələlər aiddir:

1) MDM-nin Nizamnaməsinə dəyişikliklər və ya əlavələr edilməsi;

2) MDM-nin yenidən təşkil olunması

3) MDM-nin ləğvi, ləğvetmə komissiyasının təyin edilməsi, aralıq və axırıncı ləğvetmə balanslarının təsdiq edilməsi;

4) MDM-nin Müşahidə şurası üzvlərinin seçilməsi və vaxtından əvvəl səlahiyyətlərinə xitam verilməsi;

5) MDM-nin İdarə heyəti sədrinin - Prezidentinin seçilməsi;

6) Elan olunmuş səhmlərin məhdud miqdarının müəyyən olunması

7) Səhmlərin nominal qiymətinin azaldılması, səhmlərin ümumi miqdarını azaltmaq və ya tam ödənilməyən səhmlərin silinməsi məqsədi ilə MDM tərəfindən səhmlərin bir hissəsinin əldə olunması, həmçinin "Səhmdar cəmiyyəti haqqında" Qanuna əsasən MDM tərəfindən alınan səhmlərin silinməsi yolu ilə MDM-nin nizamnamə kapitalının azaldılması

8) MDM-nin Təftiş komissiyası üzvlərinin seçilməsi və onların səlahiyyətlərinə vaxtından əvvəl xitam verilməsi;

9) MDM-nin Auditorunun təsdiqi;

10) MDM-nin illik hesabatlarının, mühasibat balanslarının, mənfƏt və zərər hesablarının təsdiq olunması, mənfƏt və zərərlərinin bölüşdürülməsi;

11) Ümumi yığıncağın aparılma qaydalarının təsdiqi;

12) Səhmdarlara məlumatları (informasiyanı) çatdırmaq formasının müəyyən olunması, həmçinin dərc olunmuş formada məlumatın veriləcəyi mətbuat orqanının müəyyən olunması

13) Səhmlərin bölünməsi və cəmlənməsi haqqında qərar çıxarılması

14) MDM-nin səmdarları üçün onun xidmətlərindən güzəştli şərtlərlə istifadə olunması qaydalarının müəyyən edilməsi;

15) MDM-nin filial və nümayəndəliklərinin yaradılması, onların fəaliyyəti haqqında Əsasnamələrin təsdiqi, MDM-nin filial və nümayəndəliklərinin ləğvi;

16) MDM-nin vəzifəli şəxslərinin əmlak cavabdehliyinə cəlb olunması haqqında qərarın çıxarılması

17) MDM-nin təşkilati strukturunun və daxili qaydalarının müəyyən edilməsi;

18) MDM-nin vəzifəli şəxslərinin əmək haqqının müəyyən edilməsi;

19) "Səhmdar cəmiyyəti haqqında" Azərbaycan Respublikasının Qanununu ilə nəzərdə tutulan digər məsələlərin həlli.

10.3. 10.2 bəndinin 1-19 yarımbəndlərində göstərilən məsələlərin həlli bilavasitə MDM-nin səhmdarların Ümumi yığıncağının müstəsna səlahiyyətlərinə aiddir.

10.4. 10.2 bəndinin 1, 2, 3, 7, 17-ci yarımbəndlərində göstərilən məsələlərin həlli səhmdarların Ümumi yığıncağında iştirak edən səhmdarların 3/4 səs çoxluğu ilə qəbul olunur.

Digər məsələlərin həlli səhmdarların Ümumi yığıncağında iştirak edənlərin adi səs çoxluğu ilə qəbul olunur.

Səhmdarların Ümumi yığıncağı illik və növbədənkənar ola bilər.

10.5. Səhmdarların illik Ümumi yığıncağı maliyyə ili qurtardıqdan sonra iki aydan tez, altı aydan gec olmayaraq keçirilir.

İllik Ümumi yığıncaqda MDM-nin Müşahidə şurasının, Təftiş komissiyasının seçilməsi məsələləri həll olunur, MDM-nin Auditoru təsdiq olunur, Müşahidə şurası tərəfindən təqdim olunmuş illik hesabata və mühasibat hesabatına baxılır.

Səhmdarların illik Ümumi yığıncağının çağırılması haqqında qərar MDM-nin Müşahidə şurası tərəfindən qəbul olunur.

10.6. Səhmdarların növbədənkənar Ümumi yığıncağı MDM-nin Müşahidə şurasının, İdarə heyətinin təşəbbüsü ilə, MDM-nin Təftiş komissiyasının, həmçinin MDM-nin səhmlərinin 10%-dən çoxunun mülkiyyətçisi olan səhmdarın (səhmdarların) tələbi ilə çağırıla bilər.

Səhmdarların Ümumi yığıncağının keçirilmə forması qərarla müəyyən olunur (birgə iştirak etmək və ya qiyabi səsvermə).

Əgər yuxarıda göstərilən şəxslərin tələbləri yığıncağın keçirilmə formasına uyğundursa, onda Müşahidə şurasının səhmdarların Ümumi yığıncağının keçirilmə formasının dəyişdirilməsinə səlahiyyəti çatmır.

Yuxarıda göstərilən şəxslərdən, səhmdarların Ümumi yığıncağının çağırılması tələbinin daxil olduğu tarixdən 10 gün müddətində MDM-nin Müşahidə şurası tərəfindən səhmdarların Ümumi yığıncağının çağırılması və ya çağırılmaması haqqında qərar qəbul olunmalıdır.

10.7. Səhmdarların Ümumi yığıncağının keçirilməsi haqqında bildiriş səhmdarlara yazılı şəkildə məktubla göndərilməklə və ya informasiyanı dərc etməklə çatdırılır.

Adlı səhm sahiblərinə Ümumi yığıncağın keçirilməsi haqqında məlumat xüsusi bildirilir. Bildiriş Ümumi yığıncağın keçirilməsinə ən geci 45 (qırx beş) gün qalmış səhmdarlara çatdırılmalıdır. Hər bir səhmdar Ümumi yığıncağın keçirilməsinə ən geci 20 (iyirmi) gün qalanadək gündəliyə dair təkliflərini vermək hüququna malikdir. Ümumi yığıncaq gündəlikdə olmayan məsələlər üzrə qərar qəbul etmək hüququna malik deyildir.

10.8. Səhmdarların Ümumi yığıncağında MDM-nin səhmdarı şəxsən və ya nümayəndəsi vasitəsilə iştirak edə bilər.

10.9. Səhmdarların Ümumi yığıncağı MDM-nin Müşahidə şurasının sədri tərəfindən və ya onun təyin etdiyi şəxs tərəfindən aparılır. Bu şəxslər olmadıqda rəyasət heyətinin üzvlərindən biri tərəfindən səhmdarların Ümumi yığıncağına sədrlik edilir.

10.10. Səhmdarların Ümumi yığıncağı səs hüququ olan səhmlərin azı 60%-nə malik olan səhmdarlar yığıncaqda iştirak etmək üçün qeydiyyatdan keçdikdə səlahiyyətli hesab olunur.

10.11. Yetərsay yığılmadığı halda sədr səhmdarların Ümumi yığıncağının yeni tarixini elan edir. Həmin tarix baş tutmamış yığıncaqdan bir gün müddətindən gec olmamalıdır.

10.12. Səhmdarların Ümumi yığıncağında səsvermə "MDM-nin səsvermə hüququ olan bir səhmi - bir səs"-dir prinsipinə əsasən aparılır.

10.13. Səhmdarların Ümumi yığıncağında səsverməyə qoyulan məsələlərə dair səs vermə hüququ olanlar MDM-nin adi səhmlərinin mülkiyyətçiləridir.

10.14. Səhmdarların Ümumi yığıncağının protokolu yığıncağa sədrlik edən şəxs və yığıncağın katibi tərəfindən imzalanır.

Maddə 11

Müşahidə şurası

11.1. MDM-nin İdarə heyətinin fəaliyyətinə nəzarət etmək məqsədilə Müşahidə şurası yaradılır.

11.2. Müşahidə şurasının üzvləri səhmdarların illik Ümumi yığıncağı tərəfindən iki il müddətinə seçilir və heç bir məhdudiyyət qoyulmadan istənilən qədər seçilə bilərlər.

Müşahidə şurası üzvlərinin sayı MDM-nin səhmdarlarının Ümumi yığıncağı tərəfindən müəyyən olunur.

Müşahidə şurasının üzvləri MDM-nin səhmdarlarından və kənar şəxslərdən seçilə bilərlər. MDM-dən asılı olan təşkilatın nümayəndəsi, dövlət hakimiyyəti və idarəetmə orqanlarının vəzifəli şəxsləri (QKDK-nın nümayəndələri istisna olmaqla) Müşahidə şurasının üzvü ola bilməzlər. Müşahidə şurasının üzvü MDM-nin İdarə heyətinin üzvü, MDM-nin hüquqşünası və müvəkkili ola bilməz.

MDM-nin sesvermə hüququ olan səhmlərinə malik səhmdarların səslərinin əksəriyyətini toplayan namizəd Müşahidə şurasının heyətinə seçilmiş hesab olunur.

11.3. Səhmdarların Ümumi yığıncağının qərarı ilə Müşahidə şurasının hər hansı üzvünün səlahiyyətləri vaxtından qabaq dayandırıla bilər.

11.4. MDM-nin Müşahidə şurasının səlahiyyətlərinə bilavasitə aşağıdakı məsələlər aiddir:

1) "Səhmdar cəmiyyəti haqqında" Azərbaycan Respublikasının Qanununda nəzərdə tutulmayan hallarda səhmdarların illik və növbədənkənar Ümumi yığıncağını çağırmaq;

2) səhmdarların Ümumi yığıncağının gündəliyini təsdiq etmək;

3) səhmdarların Ümumi yığıncağında iştirak etmək hüququ olan səhmdarların siyahısının tutulma vaxtının müəyyən olunması və səhmdarların Ümumi yığıncağının hazırlanması və keçirilməsi ilə əlaqədar "Səhmdar cəmiyyəti haqqında" Azərbaycan Respublikasının Qanununda nəzərdə tutulan digər məsələlər;

4) bu Nizamnamənin 10.2 bəndinin 4,5,6, 9 - 16, 18, 19-cu yarımbəndlərində nəzərdə tutulan məsələləri səhmdarların Ümumi yığıncağına çıxarmaq;

5) MDM-nin Prezidentinin təqdimatı əsasında İdarə heyətinin üzvlərini vəzifəyə təyin etmək;

6) İdarə heyətinin fəaliyyətinə nəzarəti həyata keçirmək;

7) MDM-nin Təftiş komissiyasının üzvlərinə və Auditor xidmətinə ödəniləcək vəsaitlərin, mükafatların, kompensasiyaların həcmini müəyyən etmək üçün səhmdarların Ümumi yığıncağına təklif vermək;

8) MDM-nin ehtiyat və digər fondlarından istifadə qaydalarını müəyyən etmək;

9) bu Nizamnamə ilə Müşahidə şurasının səlahiyyətlərinə aid edilən digər məsələlərin həlli.

11.5. Müşahidə şurasının müstəsna səlahiyyətlərinə aid edilən məsələlərin həlli MDM-nin digər icra orqanlarına həvalə edilə bilər.

11.6. Müşahidə şurasının üzvləri öz aralarından Müşahidə şurasının sədrini və müavinini seçirlər.

Müşahidə şurasının sədri onun işini təşkil edir, Müşahidə şurasının iclasını çağırır və sədrlik edir, iclaslarda protokolun aparılmasını təşkil edir, səhmdarların Ümumi yığıncağında sədrlik edir və ya bu vəzifəni digər şəxsə həvalə edir.

11.7. Müşahidə şurasının iclasları zəruri hallarda, lakin 3 (üç) ayda bir dəfədən az olmayaraq keçirilir.

Müşahidə şurasının iclası Müşahidə şurası sədrinin şəxsi təşəbbüsü, Müşahidə şurasının, Təftiş komissiyasının və ya MDM-nin icra orqanlarının tələbi ilə çağırılır.

Müşahidə şurası iclasının keçirilməsi haqqında bildiriş Müşahidə şurasının üzvlərinə məktub formasında, Müşahidə şurası tərəfindən müəyyən edilən qaydada göndərilir. Bildirişdə iclasın gündəliyi göstərilməlidir.

11.8. Müşahidə şurasının iclaslarının keçirilməsi zamanı yetərsayın olması üçün Müşahidə şurası üzvlərinin yarısından çoxunun iştirakı lazımdır.

11.9. Bu Nizamnamə ilə digər hallar nəzərdə tutulmayıbsa Müşahidə şurasının iclaslarında qərarlar adi səs çoxluğu ilə qəbul olunur.

Müşahidə şurasının iclaslarında Müşahidə şurasının üzvlərinin hər birinin bir səs hüququ var. Səslər bərabər olduqda sədrin səsi həlledici hesab edilir.

Müşahidə şurasının qərarı qiyabi səsvermə (sorğu yolu) ilə də qəbul oluna bilər.

Maddə 12

MDM-nin İdarə heyəti

12.1. MDM-nin İdarə heyətinin səlahiyyətlərinə aşağıdakılar daxildir:

- MDM-nin Ümumi yığıncağının və Müşahidə şurasının müstəsna səlahiyyətlərinə aid edilən məsələlərdən başqa, MDM-nin fəaliyyəti ilə bağlı bütün məsələləri həll etmək ;

- MDM-nin fəaliyyət proqramını, gələcək və cari planlarını tərtib etmək və səhmdarların Ümumi yığıncağının təsdiqinə vermək, həmçinin onların yerinə yetirilməsi haqqında hesabat hazırlamaq;

- Müşahidə şurasından aldığı səlahiyyətlər çərçivəsində investisiya və maliyyə proqramını həyata keçirmək;

- MDM tərəfindən qiymətli kağızların buraxılışını və yerləşdirilməsini həyata keçirmək;

- MDM tərəfindən yerləşdirilən qiymətli kağızları əldə etmək;

- MDM-nin qeyri-kommersiya təşkilatlarında iştirak etməsi haqqında qərar qəbul etmək;

- MDM-nin ayrılmaz bölmələrinin yaradılması və ləğvi haqqında səhmdarların Ümumi yığıncağının qərarını yerinə yetirmək;

- MDM-nin səhmdarlarının reyestrində olan informasiyaya buraxılış qaydalarını müəyyən etmək;

- MDM-nin qiymət siyasətini müəyyən etmək;

- İdarə heyətinin tabeliyində olan bölmələrə münasibətdə MDM-nin kadr siyasətini aparmaq;

- kütləvi informasiya orqanlarında MDM-nin cari fəaliyyətini işıqlandırmaq və ictimaiyyətlə əlaqələr yaratmaq.

12.2. MDM-nin İdarə heyətinin sədri funksiyalarını MDM-nin Prezidenti həyata keçirir.

12.3. MDM-nin Prezidenti səlahiyyətlərinə, səhmdarların Ümumi yığıncağının və Müşahidə şurasının müstəsna səlahiyyətlərinə aid olan məsələlərdən başqa MDM-nin fəaliyyətinə rəhbərliyin digər məsələləri daxildir.

Prezident MDM-nin səhmdarlarının Ümumi yığıncağının və Müşahidə şurasının qərarlarının yerinə yetirilməsini təşkil edir.

12.4. MDM-nin Prezidenti MDM-nin adından etibarnaməsiz fəaliyyət göstərir və həmçinin:

- MDM-nin fəaliyyətinə operativ rəhbərlik edir;

- Azərbaycan Respublikasının ərazisində və onun hüdudlarından kənarda dövlət təşkilatlarına, hüquqi şəxslərə (kommersiya və qeyri-kommersiya), fiziki şəxslərə münasibətdə MDM-nin maraqlarını təmsil edir;

- əqdlər bağlayır;

- MDM-nin əmlakına sərəncam verir;

- etibarnamə verir;

- banklarda və digər kredit təşkilatlarında MDM-nin hesablarını açır;

- Müşahidə şurasına İdarə heyəti üzvlərinin namizədlərini təsdiq olunmaq təqdim edir;

- mühasibat uçotunun aparılmasını və MDM tərəfindən hesabatın təqdim olunmasını təşkil edir;

- ştat cədvəlini təsdiq edir, MDM-nin işçiləri ilə əmək müqaviləsini bağlayır, mükafatlandırır, töhmət verir;

- MDM-nin işçiləri üçün icrası məcburi olan əmrlər və tapşırıqlar verir;

- dövlət təşkilatları, hüquqi və fiziki şəxslərə qarşı məhkəmələrdə, o cümlədən iqtisad məhkəməsində və münsiflər məhkəməsində iddia qaldırır.

12.5. MDM-nin Prezidentinin işdə olmadığı müddətdə və digər hallarda MDM-nin Prezidenti öz vəzifələrinin icrasını müavinlərdən birinə həvalə etmək hüququna malikdir.

Maddə 13

Təftiş komissiyası və audit

13.1. MDM-nin maliyyə-təsərüffat fəaliyyətinə nəzarəti MDM-nin Təftiş komissiyası həyata keçirir.

13.2. Təftiş komissiyasının üzvləri MDM-nin illik Ümumi yığıncağında bir il müddətinə seçilirlər.

Səhmdarın təklifi ilə səhmdar və ya digər şəxs Təftiş komissiyasının üzvü seçilə bilər.

MDM-nin Təftiş komissiyasının üzvləri eyni zamanda MDM-nin Müşahidə şurasının üzvü ola həmçinin MDM-nin idarəetmə orqanlarında digər vəzifə tuta bilməzlər.

13.3. Təftiş komissiyası üzvlərinin səlahiyyətlərinə MDM-nin Ümumi yığıncağının qərarı ilə vaxtından əvvəl xitam verilə bilməz.

13.4. Təftiş komissiyası öz üzvlərindən Təftiş komissiyasının sədrini seçir.

13.5. MDM-nin maliyyə-təsərrüfat fəaliyyətinin yoxlanması (təftişi) MDM-nin illik yekun fəaliyyətinin nəticəsində, səhmdarların Ümumi yığıncağının qərarı, MDM-nin Müşahidə şurası və ya MDM-nin səhmlərinin 10%-dən az olmayan sayının sahibi olan səhmdarların tələbi ilə aparılır.

MDM-nin idarəetmə orqanlarında vəzifə tutan şəxslər MDM-nin Təftiş komissiyasının tələbi ilə MDM-nin maliyyə-təsərrüfat fəaliyyətinə dair sənədləri onlara təqdim etməlidirlər.

13.6. MDM-nin səhmdarlarının Ümumi yığıncağının keçirilməsinə 10 gün qalmış MDM-nin Təftiş komissiyası illik maliyyə-təsərrüfat fəaliyyətinin nəticələrini Müşahidə şurasına təqdim edir.

13.7. MDM-nin Auditorunun namizədliyi Müşahidə şurasının təklifi ilə MDM-nin səhmdarlarının Ümumi yığıncağı tərəfindən təsdiq edilir.

MDM-nin auditoru MDM-nin mühasibat uçotunun aparılmasının düzgünlüyünü və mühasibat hesabatlarının həqiqiliyini yoxlayır.

Maddə 14

MDM-nin əmlakı və mənfƏti

14.1. Əsas vəsaitlər, dövriyyə vəsaitləri, maddi və qeyri-maddi aktivlər, qiymətli kağızlar və Azərbaycan Respublikasının qanunvericiliyinə uyğun olaraq mülkiyyət hüququnun obyekti olan hər bir əmlak MDM-nin əmlakını təşkil edə bilər.

14.2. MDM-nin əmlakı aşağıdakı mənbələr hesabına formalaşır:

- MDM-nin yerləşdirdiyi səhmlərin və digər qiymətli kağızların ödənilməsi üçün verilmiş əmlak;

- işlərin, xidmətlərin həyata keçirilməsindən və digər təsərrüfat fəaliyyəti növlərindən gəlirlər;

- qiymətli kağızlarla əməliyyatlardan gəlirlər;

- bank kreditləri və digər kreditorlar vasitəsilə cəlb edilən vəsaitlər;

- digər qanuni mənbələr.

14.3. MDM-nin balans və xalis mənfƏti Azərbaycan Respublikasının qanunvericiliyinə müvafiq olaraq müəyyən olunur. MDM-nin xalis mənfəəti (vergilərin və digər məcburi ödənişlərin verilməsindən sonra) MDM-nin sərəncamında qalır və MDM-nin inkişafına yönəldilir.

14.4. MDM-nin ehtiyat və digər fondları yaradılır.

Onlardan istifadə qaydaları Müşahidə şurası tərəfindən müəyyən olunur.

14.5. Ehtiyat fondu MDM-nin nizamnamə kapitalının 15%-i həcmində yaradılır.

MDM-nin ehtiyat fondu Azərbaycan Respublikasının qanunvericiliyində nəzərdə tutulan güzəştlərin istifadəsi hesabına, həmçinin hər il xalis mənfƏtdən ayırmalar hesabına formalaşır.

Ehtiyat fondu MDM-nin zərərlərini ödəmək və MDM-nin səhmlərinin satınalınması üçün nəzərdə tutulur.

Maddə 15

MDM-nin uçot və hesabatı

15.1. MDM Azərbaycan Respublikasının hüququ aktlarında müəyyən olunmuş qaydada mühasibat uçotu və maliyyə hesabatı aparır.

15.2. MDM-nin Prezidenti mühasibat uçotunun təşkilinə, vəziyyətinə və həqiqiliyinə görə məsuliyyət daşıyır.

15.3. Maliyyə ili 1 yanvar - 31 dekabr (daxil olmaqla) dövrünü əhatə edir.

15.4. MDM aşağıdakı sənədləri saxlayır:

a) MDM-nin Nizamnaməsini və MDM-nin dövlət qeydiyyatı haqqında şəhadətnaməsini;

b) səhmdarların Ümumi yığıncağı və Müşahidə şurası tərəfindən təsdiqlənən MDM-nin daxili aktlarını

v) MDM-nin balansındakı əmlakına olan hüququnu təsdiq edən sənədləri;

q) mühasibat uçotunun sənədlərini;

d) müvafiq orqanlara təqdim olunan maliyyə-hesabat sənədlərini;

e) səhmdarların Ümumi yığıncaqlarının, Müşahidə şurasının və Təftiş komissiyasının protokollarını

ə) MDM-nin Auditorunun apardığı yoxlamaların nəticələrini;

c) Azərbaycan Respublikasının qanunvericilik aktlarında nəzərdə tutulan digər sənədləri.

Maddə 16

MDM-nin yenidən təşkili və ləğvi

16.1. MDM səhmdarlarının Ümumi yığıncağının qərarı ilə və Azərbaycan Respublikasının qanunvericiliyində nəzərdə tutulan digər hallarda yenidən təşkil oluna bilər.

16.2. MDM aşağıdakı hallarda ləğv edilə bilər:

a) səhmdarlarının Ümumi yığıncağının qərarı ilə;

b) Azərbaycan Respublikasının qanunvericiliyi ilə nəzərdə tutulan hallarda məhkəmənin qərarı ilə.

16.3. MDM-nin ləğvi səhmdarlarının Ümumi yığıncağının və ya məhkəmənin yaratdığı ləğvetmə komissiyası tərəfindən aparılır.

16.4. Ləğvetmə komissiyası yaradılan vaxtdan MDM-nin idarə olunması səlahiyyətləri onun sərəncamına keçir.

Ləğvetmə komissiyası MDM-nin adından məhkəmədə iştirak edir.

16.5. Ləğvetmə komissiyası hüquqi şəxslərin qeydiyyatı haqqında məlumatları dərc edən mətbuat orqanlarında MDM-nin ləğv olunması və onun kreditorlarının tələblərinin təqdim olunması vaxtı haqqında məlumat dərc etdirir. Kreditorların tələblərinin təqdim olunması vaxtı məlumat dərc olunan vaxtdan etibarən 2 (iki) aydan az olmamalıdır.

16.6. Ləğvetmə komissiyası kreditorların müəyyən olunmasına və debitor borcların alınmasına dair tədbirlər görür.

Kreditorların tələblərinin təqdim olunma vaxtı sona çatdıqda ləğvetmə komissiyası özündə MDM-nin əmlakı haqqında, kreditorlar tərəfindən təqdim olunan tələblər və onlara baxılması haqqında məlumatı əks etdirən aralıq balansını tərtib edir. Aralıq balansı səhmdarların Ümumi yığıncağı tərəfindən təsdiq olunur.

16.7. MDM-nin pul vəsaitlərinin kreditorlara verilməsi ləğvetmə komissiyası tərəfindən Azərbaycan Respublikası qanunuvericiliyində nəzərdə tutulmuş qaydada həyata keçirilir.

16.8. Kreditorlarla hesablaşmalardan sonra, ləğvetmə komissiyası səhmdarların Ümumi yığıncağı tərəfindən təsdiq olunmaq üçün ləğvetmə balansını tərtib edir.

16.9. Kreditorlarla hesablaşmalardan sonra MDM-nin sərəncamında qalan əmlak səhmdarlar arasında onların səhmlərinin miqdarına uyğun bölüşdürülür.

16.10. Hüquqi şəxslərin Vahid Dövlət Reyestrində müvafiq qeydlər edildikdən sonra MDM ləğv edilmiş hesab olnur.

16.11. MDM-nin təşkilati - hüquqi forması dəyişdikdə, MDM-nin fəaliyyəti ilə bağlı sənədlər hüquqi şəxslər üçün müəyyən olunmuş qaydada hüquqi varisə verilir.

Hüquqi varis olmadıqda sənədlər saxlanmaq üçün Azərbaycan Respublikasının Dövlət Arxivinə təqdim edilir.