Milli Depozit Mərkəzi (MDM) Azərbaycan Respublikası Prezidentinin 14 may 1997-ci il tarixli 580 nömrəli Fərmanı ilə təsdiq edilmiş "Milli Depozit Sistemi haqqında" Əsasnaməyə müvafiq olaraq 18 sentyabr 1997-ci ildə təsis edilmiş və ilk adı “Mülk” Milli Depozit Mərkəzi olmuşdur.
Qapalı səhmdar cəmiyyəti formasında təsis edilən MDM-in nizamnamə kapitalı 1 400 000 AZN təşkil edir. MDM-in səhmlərinin 100%-i Azərbaycan Respublikasının Qiymətli Kağızlar üzrə Dövlət Komitəsinə məxsusdur.
MDM-in yaradılmasında ilkin məqsəd dövlət mülkiyyətinin özəlləşdirilməsi nəticəsində yaradılan səhmdar cəmiyyətlərin səhmlərinin saxlanılması və səhmdarlarının uçotunun aparılması olmuşdur. Qiymətli kağızların saxlanılması və reyestrin aparılması xidmətlərinə dair ilk müqavilə 1998-ci ildə imzalanmışdır.
Bizim missiyamız müştərimiz olan hər bir investorun hüquqlarını qorumaq, rəqabətli beynəlxalq hesablaşma institutu olmaqla, korporativ idarəetmə prinsiplərinə və maliyyə şəffaflığına əsaslanaraq qiymətli kağızlar bazarında “mərkəzi bank” funksiyalarını yerinə yetirən mərkəzi institusional quruma çevrilmək, qiymətli kağızlarla bağlı tranzaksiyaların yeni standartlarını tətbiq etmək və elə bir institut olmaq ki, onun məhsulları, xidmətləri və təcrübəsi fond bazarında tövsiyə və nümunə kimi qəbul olunsun.
